- Söhbətə istirahətdən başlayaq. Necə dincəlirsiniz?

- Əla, Mingəçevirdə dincəlirəm. Bəzi futbolçular xaricə gedirlər. Mən isə bayramları doğma evimdə əzizlərimlə birgə keçirirəm. Yeni il axşamı da evdəkilərlə oturub, yaxşı yeyib-içdik.

- Komandanız qış fasiləsinə çempion kimi çıxıb. Bunun yaratdığı nə kimi arxayınçılıqlar var?

- Cari çempionatda cəmi 6 ay oynamışıq. Yolun yarısını çempion kimi başa vurmuşuq. Elə bil ki, qarşıda uca dağ var. Əziyyət çəkə-çəkə dağın yarısına qədər dırmanmışıq. Lazımdır ki, qarlı zirvəyə qalxıb, çempionluğu qeyd edək. Yalnız vəzifənin 50 faizini yerinə yetirmişik.

- Ötən mövsümdə də çempion heyətdə idiz. Amma bir-birini əvəzləyən aylar komandada çox şeyi dəyişib. Maraqlıdır, ötən illə müqayisədə iddialarda nə dəyişiklik var, nə üstün və mənfi cəhətlər mövcuddur?

- İndi vəziyyət belədir ki, komanda hücum futbolu nümayiş etdirir. Arxada oturub, şans gözləyib rəqibi əks-hücumda yaxalamırıq. Oyundan-oyuna çalışırıq ki, Avropa futbolu nümayiş etdirək. Görürsünüz ki, 2 qol hesabı ilə irəli olanda da qollar vurub, arenaya gələn tamaşaçıları sevindirməyə çalışırıq. Ən azı öz oyunumuzla yadda qalmaq niyyətindəyik.

- Rəşad Abdullayev cəzalı olan vaxt 4 oyun mütəmadi çıxış etdiniz. Pis oynamasanız da, Abdullayev qayıdan kimi Böyükağa Hacıyev sizi yenə ehtiyata göndərdi. Demək olarmı ki, siz əvəzləyicisiniz?

- Özümü heyətdə yer alanların heç birindən zəif saymıram. Əgər zəif çıxış etsəydim, “Neftçi”də deyil, bir başqa komandada olardım. İndi bəzi səbəblərə, nəyəsə görə ehtiyatda qalıram. Bu o demək deyil ki, mənə inam yoxdur. Həm məşqçilər korpusu, həm də rəhbərlik tərəfindən hər zaman dəstək görmüşəm. Mənə deyiblər ki, bizə lazımsan. Zənnimcə, geridə qalan 4-5 oyunda heç də zəif təsir bağışlamadım, bəslənilən etimadı doğrultdum.

- Həm müdafiə, həm də yarımmüdafiə xəttində çıxış edə bilən futbolçularımız barmaqla sayıla biləcək qədərdir. Bu mənada, digər klublardan dəvət almağınız normal haldır. Qış fasiləsində kimsə sizə dəvət göndəribmi?

- Əlbəttə, var. Azdan-çoxdan oynamışam. Məni tanıyırlar. Dəvət edənlər də deyirlər ki, “Neftçi”də ehtiyatda oturmaqdansa, gəl, bizdə daima oyna. Mənimsə getmək fikrim yoxdur. Çünki 3 ildir ki, bu komandadayam. Özümü xoşbəxt hiss edirəm. Əgər 3 il ərzində bu şansı gözləmişəmsə, indi də heç yerə getmək fikrində deyiləm. Müqaviləm olduğuna görə, komandanı yarı yolda qoyub harasa getmək istəmirəm.

- Sirr deyilsə, xidmətinizdə hansı komandalar maraqlı idi?

- 2 komanda mənə dəvət göndərib ki, hər ikisi paytaxtı təmsil edir. Adlarını reklam üçün demirəm. 100 faizli dəvət idi.

- Sizin meyxanaya da marağınız var. Bu maraq haradan qaynaqlanır?

- Azərbaycan yığmasının qapıçısı Kamran Ağayevlə komanda yoldaşı olmasaq da, çox yaxın dostuq. Daha da konkretləşdirib, futbol dili ilə desək, “düşmən” komandalarda oynayırıq. Aramızda ciddi rəqabət var. Oyunun gedişində Kamranla dalaşıb-vuruşa da bilərəm. Amma matç başa çatdıqdan sonra yenə qardaş kimi görüşüb, qucaqlaşırıq. Mən rus sektorunda təhsil almağıma baxmayaraq, Azərbaycanın yazılı və şifahi ədəbiyyatına çox yaxından bələdəm. Kamran özü də məəttəl qalır ki, sən hara, meyxana hara?

- Bəs meyxana demək qabiliyyətiniz varmı?

- Allaha şükür, bacarığım var. Hansısa məclisdə desələr ki, gəl 1-2 kəlmə də sən de, "çulumu sudan çıxararam".

- Heç Kamran Ağayevlə deyişmisiniz?

- Onu özü açdığı qafiyə ilə bağlayıram. O da deyir ki, sənə halaldır. Meyxananın elə incəlikləri var ki, mən ondan yaxşı bilirəm.